काठमाडौं । दर्शक अभावमा केही दिनमै नेपालका हलबाट उत्रिएको भारतीय फिल्म ‘ट्वेल्थ फेल’को चर्चा यतिबेला भइरहेको छ । डेढ महिनाअघि बटरफ्लाइ मुभिजले यसलाई नेपालमा रिलिज गरेको थियो । दर्शकै नगएपछि फिल्मलाई हलबाट मात्र उतारिएन, वितरकले घाटासमेत व्यहोर्नुपर्यो ।
ओटीटीमा रिलिज भएपछि भने यो फिल्मको चर्चा नेपालमा आकाशिएको छ । सामाजिक सञ्जालका टाइमलाइनमा ‘टुवेल्थ फेल’को प्रशंसा भइरहेको छ । इन्टरनेट दर्शकले यसलाई ‘उत्प्रेरक’ भन्दै प्रशंसा वर्षाइरहेका छन् । आईएमडीबीसहितका प्लाटफर्मले उच्च रेटिङ दिएका छन् ।
उक्त अन्तर्वार्तामा विक्रान्त भन्छन्, ‘सगरमाथा चढ्ने पहिलो मानिस एडमण्ड हिलारी थिए । सबैले उनको फोटो देखेका छन् । तर आङरिता पहिलो शेर्पा थिए जसले सगरमाथा बिना अक्सिजनको मद्दतमा चढेका थिए । मैले उनको फोटो देखेको छु सर । मेरो विचारमा बिना अक्सिजनको सपोर्टमा चढ्नु धेरै ठूलो कुरा हो । म पनि यहाँसम्म बिना अक्सिजनको मद्दतमा आइपुगेको छु । त्यो पनि नांगै पैतालामा ।’
यो दृश्य सामाजिक सञ्जालमा भाइरल भएपछि चर्चित नेपाली आरोहीले पनि सकारात्मक भन्दै प्रशंसा गरिरहेका छन् ।
१० पटक बिना अक्सिजन सगरमाथा जितेका आङरिता शेर्पाको ७२ वर्षको उमेरमा सन् २०२० मा निधन भइसकेको छ । अन्तिम पटक चढेपछि उनले गिनिज विश्व कीर्तिमान पनि रचेका थिए ।
‘टुवेल्थ फेल’को कुरा गर्दा विधुविनोद चोपडा निर्देशित यो फिल्म अनुराग पाठकद्वारा लिखित सन् २०१९ को सोही नामको पुस्तकमा आधारित छ । यसको कथावस्तु मनोजकुमार शर्मा र श्रद्धा जोशी शर्माको वास्तविक जीवनमा आधारित छ ।
भारतीय बक्स अफिसमा भने यसले राम्रो कमाइ गरेको छ । शिक्षा र परीक्षा प्रणालीका चुनौतीको कथावस्तुमा बनेको फिल्मले विश्वभर ६६ करोड भारु कमाएको छ । यो फिल्म डिज्नी प्लस हटस्टारमा रिलिज भइसकेको छ । तर युट्युबलगायत प्लाटफर्ममा समेत यसको पाइरेसी संस्करण छ्याप्छ्याप्ती देखिएको छ ।
